महानगरको २४ घण्टे अल्टिमेटमपछि फनपार्कले हतार–हतार तिर्‍यो कर

खोज पत्रिका बिहिबार, २०७९ भदौ १६, १८ :०० बजे

काठमाडौं । काठमाडौं महानगरको अल्टिमेटमपछि भृकुटीमण्डपस्थित फनपार्कले हतार–हतार कर तिरेको छ । बिहिबार फनपार्क व्यवस्थापनले १७ लाख ३७ हजार मनोरञ्जन कर तिरेको हो । फनपार्कका म्यानेजर बोधराज कट्टेलले महानगलाई मनोरञ्जन कर बुझाएको जनकारी दिए ।

काठमाडौं महानगरपालिकाले बुधबार २४ घण्टे अल्टिमेटम दिएर पत्र काटेपछि सञ्चालकले भने महानगरलाई कर तिर्न बाँकी नरहेको दाबी गर्दै आएका थिए । हिजो महानगरको राजस्व विभागका प्रमुख डाक्टर शिवराज अधिकारीले फनपार्कलाई पत्र लेख्दै महानगरको बक्यौता कर (व्यवसाय कर, बहाल कर, विज्ञापन कर तथा मनोरञ्जन कर) २४ घण्टाभित्र बुझाउन ताकेता गरेका थिए ।

तोकिएको समयभित्र बक्यौता नतिरे फनपार्क ‘सिल’ गरिदिने चेतावनी पत्रमा दिइएको छ । फनपार्कले समाजकल्याण परिषदलाई मासिक ६ लाख १० हजार ५ सय रूपैयाँ भाडा तिर्ने गरेको छ । सञ्चालनमा आएको ७ वर्षपछि पहिलो पटक फनपार्कले महानगरलाई कर तिरेको हो ।

क्याटेगोरी : देश/दुनियाँ, प्रमुख समाचार, राजनीति, समाचार