फोहोर उठाउन नसकेको भन्दै वडाध्यक्षहरु खनिए मेयर बालेन्द्रविरुद्ध

खोज पत्रिका बिहिबार, २०७९ साउन २६, २२ :२० बजे

काठमाडौं । काठमाडौं उपत्यकामा फोहोर उठ्न नसकेको भन्दै मेयर बालेन्द्र साहबिरुद्ध वडाध्यक्षहरु खनिएका छन । थुप्रिएको फोहोरलाई लिएर महानगरको नगर कार्यपालिका बैठकमा मेयर साहको चर्को आलोचना भएको हो । बैठकमा एमाले–कांग्रेसका वडाध्यक्षहरु मेयर बालेन्द्र साहविरुद्ध आक्रमक रुपमा प्रस्तुत भएका थिए ।

फोहोरको समस्याको सबै दोष उनीहरुले साहमाथि थोपर्ने प्रयास गरेका थिए । आजको बैठकको सुरुवातमा साहले छलफलका लागि १३ वटा प्रस्ताव अघि सारेका थिए । तर, वडाध्यक्षहरुले भने फोहोर व्यवस्थापनबाहेक अरु विषयमा छलफल नै नगर्ने अडान लिएका थिए ।

उनीहरुले भोलिदेखि जात्रा सुरु हुने भएकाले फोहोरको समस्या भयावह बनेको बताए । त्यसपछि मेयर साहले फोहोर व्यवस्थापनका विषयमा भएको प्रगतिबारे व्रिफिङ गरेका थिए । तीन दिनअघिसम्म दैनिक २०० देखि ३०० टिपसम्म फोहोर गइरहेको तर, अस्ति राति गाडी तोडफोड भएपछि फोहोर फाल्ने क्रम रोकिएको उनले बताए ।

यस विषयमा हिजो सहरी विकास मन्त्रालयमा बैठक बसेको भन्दै उनले भोलिबाट फोहोर उठ्नेमा आश्वस्त तुल्याउन खोजे । तर, वडाध्यक्षहरुले चित्त नबुझेको बताएका थिए । काठमाडौं–७ का वडाध्यक्ष विमल होडा मेयर साहप्रति आक्रोशित शैलीमा पेश भए । उनले फोहोर व्यवस्थापनका लागि बनेको कार्यदलको बैठक कतिपटक बस्यो भन्ने जानकारी दिन मेयर साहसँग माग गरेका थिए ।