उपसचिव र शाखा अधिकृतबीच उच्च अदालत पाटनमा कुटाकुट

खोज पत्रिका सोमवार, २०७९ असार २०, १३ :४२ बजे

काठमाडौं । उच्च अदालत पाटनमा उपसचिव र शाखा अधिकृतबीच कुटाकुट भएको खुलेको छ । शाखा अधिकृत हिरालाल भुसालले उपसचिव रमेश श्रेष्ठलाई कार्यकक्षमै गएर कुटपिट गरेको बताइएको छ । आइतबार अपरान्ह १ बजे पाटन उच्च अदालतका उपसचिव रमेश श्रेष्ठमाथि हातपात भयो । आफ्नो कार्यकक्षमै बसिरहेको समयमा श्रेष्ठमाथि भुसालले अनुहार तथा शरीरका विभिन्न भागमा आक्रमण गरेको बताइएको छ ।

आक्रमणको कारणचाहिँ बेरितको निवेदनमा हस्ताक्षर गर्दिन, रितपूर्वक निवेदन ल्याउनु भन्ने मात्रै थियो । शाखा अधिकृत भुसालले मुद्दाका एक पक्षको म्याद थाम्ने निवेदनमा शुक्रबार नै पत्र काटी पुरानो म्याद बदर गरी नयाँ म्याद दिइसकेका थिए । तर, उक्त म्याद बदर र म्याद थाम्ने निवेदनमा सक्कली म्याद थिएन भने आवश्यक कागजात र बुझ्नुपर्ने विषय पनि बुझिएको थिएन ।

केही नबुझी शाखा अधिकृत भुसालले शुक्रबार नै पत्र दिएर आइतबार स्वीकृतिका लागि ल्याएपछि बेरितको भन्दै उपसचिव श्रेष्ठले हस्ताक्षर गर्न अस्वीकार गरेका थिए । हस्ताक्षर गर्न अस्वीकार गरेलगत्तै शाखा अधिकृत भुसालले आक्रमण गरेको बताइएको छ ।

सामान्यतः म्याद तामेल गरेको १५ दिनभित्र जसलाई म्याद तामेल गरिएको हो, ती व्यक्ति अदालतमा उपस्थित हुनुपर्छ १५ दिनभित्र उपस्थित हुन नसकेमा थप १५ दिन गरी कुल ३० दिनको समय पाइन्छ । तर शुक्रबार निवेदन लिएर आएका व्यक्ति ३० दिन पनि गुजारेपछि म्याद थपका लागि अदालतमा निवेदन लिएर आएका थिए ।