रुकुमपूर्वको सिस्ने गाउँपालिकामा दर्जनबढी सकेट बम फेला

खोज पत्रिका शुक्रबार, २०७८ फाल्गुन २७, १० :१४ बजे

रुकुमपूर्व । जिल्लाको एक जंगलमा एक दर्जन बढी सकेट बम फेला परेका छन् । सिस्ने गाउँपालिका–२ बुर्किसल्लाको जंगलमा सकेट बम फेला परेका हुन् । ओढारमा प्लास्टिकको ड्रममा लुकाएर राखिएको अवस्थामा शंकास्पद वस्तु फेला परेपछि स्थानीयले वडा कार्यालयलाई जानकारी गराएका थिए । त्यसपछि वडा कार्यालयले प्रहरीलाई खबर गरेको थियो ।

प्रहरीले कालो प्लाष्टिकको ड्रमभित्र एक दर्जन बढी सकेट बमजस्तो देखिने वस्तु फेला परेको जनाएको छ । सो क्षेत्रमा माओवादीको प्रभाव पर्ने भएकाले ती वस्तु द्वन्द्वकालमा लुकाएर राखिएका बम नै हुन सक्ने प्रहरीले आशंका गरेको छ । निष्कृय पार्न नेपाली सेनाको टोली पनि घटनास्थलमा जाँदैछ ।

बम कति संख्यामा छ भन्ने एकिन नभए पनि कालो रंगको ड्रमभित्र दर्जनभन्दा बढी नै रहेको हुनसक्ने प्रहरीको भनाइ छ । बम भेटिएको स्थान सदरमुकाम रुकुमकोटबाट एकदिन पैदल दुरीमा रहेको छ ।