निजामती कर्मचारी युनियनमा रुकुमबाट भुपेन्द्र, गोपाल र निर्मलाको उमेद्वारी

खोज पत्रिका आइतवार, २०७८ फाल्गुन २२, २० :४० बजे

काठमाडौं । नेपाल निजामति कर्मचारी युनियनको ८ औं महाधिवेशनमा रुकुमबाट ३ जनाले उम्मेद्वारी दिने घोषणा गरेका छन् । शनिबारदेखि सुरु भएको नेपाल निजामती कर्मचारी युनियनको ८ औँ महाधिवेशनमा भुपेन्द्र अधिकारीले केन्द्रीय सचिव युवा पदमा उम्मेद्वारी दिने घोषणा गरेका छन् ।

वर्तमान कार्यसमितिमा केन्द्रीय सदस्यसमेत रहेका अधिकारी श्रम मन्त्रालयमा नायव सुब्बा पदमा कार्यरत छन् । २०६७ सालमा निजामती सेवामा प्रवेश गरेका मुसीकोट नगरपालिका–२ निवासी अधिकारी कर्मचारी वृतमा इमान्दार, निडर र देशभरि राम्रो सञ्जाल भएको कर्मचारीको रुपमा चिनिन्छन् । उनले गोपाल पोखरेल नेतृत्वको टिमबाट उम्मेद्वारी दिएको बताए ।

यस्तै खुला केन्द्रीय सदस्यतर्फ गोपाल शर्माले उम्मेद्वारी घोषणा गरेका छन् । नेपाल प्रेस युनियन रुकुमका पूर्व अध्यक्ष समेत रहेका २०६८ सालदेखि निजामति सेवामा कार्यरत छन् । मालपोत कार्यालय रुकुम पश्चिममा कार्यरत शर्माले कर्मचारी वृतमा आफ्नो छवि राम्रो भएकाले सबैले आफूलाई सहयोग गर्ने दाबी गरे ।

त्यस्तै, युवा महिला केन्द्रीय सदस्यमा जिल्ला अदालत रुकुम पूर्वमा लेखापाल पदमा कार्यरत निर्मला शर्माले पनि उम्मेद्वारी घोषणा गरेकी छन् । पत्रकारिताबाट निजामति सेवामा प्रवेश गरेकी शर्मा इमान्दार कर्मचारीका रुपमा रहेकोले जित्ने आधार भएको उनको दाबी छ । २०७५ सालदेखि निजामति सेवामा प्रबेश गरेकी शर्माले जितका लागि प्रचार–प्रसारलाई तिब्रता दिएकी छन् ।