मन्त्री आलेको एक्सनः याक एण्ड यतिको लाइसेन्स खारेजपछि ८१ करोड उठ्यो रोयल्टी, सवा अर्ब अझैँ बाँकी

खोज पत्रिका मङ्लबार, २०७८ फाल्गुन १०, १६ :०५ बजे

काठमाडौं । संस्कृति पर्यटन तथा नागरिक उड्डयनमन्त्री प्रेमबहादुर आलेको निर्देशनपछि क्यासिनो सञ्चालन गरेबापत तिर्नुपर्ने रोयल्टी तिर्न ब्यापारीहरुले दौडधुप गरिरहेका छन् । याक एण्ड यतिको लाइसेन्स खारेजपछि सरकारको खातामा क्यासिनो कम्पनीबाट ८१ करोड रुपैयाँ राजस्व सङ्कलन भएको छ ।

रोयल्टी नतिर्ने क्यासिनोले पनि रोयल्टी तिर्न दौडधुप गरिरहेका छन् । अरु केही कम्पनीले रोयल्टी तिर्नका लागि कागजपत्र लगेका छन्, केही दिनमा अरु पनि रकम उठ्ने सम्भावना बढेको छ । मन्त्री आलेले दुई साता अघि क्यासिनोको रोयल्टी नतिर्नेको लाइसेन्स खारेज हुने चेतावनी दिएसँग अहिले क्यासिनो सञ्चालकले रोयल्टी तिर्न थालेका पर्यटन विभागले जनाएको छ ।

हालसम्म कम्तीमा पनि १७ कम्पनीले रोयल्टी तिर्नुपर्ने बक्यौता बुझाएका छन् भने गोल्डेन फिङ्गर गेमिङ् जोन प्रालीले नयाँ क्यासिनो सञ्चालन गरेबापत २ करोड ५० लाख रुपैयाँ रोयल्टी बुझाएसँगै सरकारको खातामा ८१ करोड रुपैयाँ रकम जम्मा भएको हो । सरकारलाई क्यासिनो सञ्चालकले तिर्नुपर्ने बक्यौता रकम १ अर्ब ११ करोड ८४ लाख ४७ हजार रुपैयाँ मात्रै छ ।

मन्त्री आलेकै निर्देशनमा क्यासिनोको रोयल्टी वर्षौसम्म पनि नतिर्ने काठमाडौँको दरबारमार्गमा रहेको होटेल याक एण्ड यतीको लाइसेन्स खारेज गरिएपछि अहिले अन्य क्यासिनो सञ्चालकले रकम तिर्न सुरु गरेको विभागले जनाएको छ । मन्त्री आलेकै निर्देशनपछि विभागले रोयल्टी नतिर्ने क्यासिनो सञ्चालकको तीनपुस्ते विवरण समेत सार्वजनिक गरेको छ । अब छ वटा कम्पनीले रोयल्टी नवीकरण दस्तुर बुझाउन बाँकी छ ।

क्याटेगोरी : अर्थ, प्रमुख समाचार, राजनीति, समाचार
ट्याग : #क्यासिनो, #याक एण्ड यति