डाक्टर गोविन्द केसीले स्वास्थ्यमन्त्री बिरोध खतिवडालाई बुझाए ७ बुँदे ज्ञापनपत्र

खोज पत्रिका बिहिबार, २०७८ माघ २०, १९ :३२ बजे

काठमाडौं । चिकित्सा शिक्षा सुधारको माग गर्दै आएका डाक्टर गोविन्द केसीले स्वास्थ्य तथा जनसंख्या मन्त्री विरोध खतिवडालाई ७ बुँदे मागसहितको ज्ञापनपत्र बुझाएका छन् । बिहिबार बुझाइएको ज्ञापनपत्रमा सरकारसँग भएका सम्झौताहरु कार्यान्वयन गर्न तथा स्वास्थ्य सेवा गुणस्तरीय, निशुल्क, सुलभ बनाउन केसीले माग गरेका छन् । देशभर खुलेका मापदण्डविनाका निजी स्वास्थ्यसंस्था बन्द गराउन उनले सरकारलाई आग्रह पनि गरेका छन् ।

पूर्वाधार र पर्याप्त जनशक्तिबिना निजी स्वास्थ्य संस्था खुल्ने क्रम बढेको भन्दै डाक्टर केसीले यसबाट बिरामी ठगीने तथा मृत्यु हुनेसम्मको अवस्था रहेको उल्लेख गरेका छन् । नोबेल मेडिकल कलेज र काठमाडौं मेडिकल कलेजमा चिकित्साशास्त्रका विद्यार्थीसँग अतिरिक्त रकम माग गरिएको भन्दै डाक्टर केसीले ती कलेजका सञ्चालकलाई कारवाही गर्न पनि माग गरेका छन् ।

आपराधिक पृष्ठभूमिका व्यक्तिले चलाइरहेका नोबेल मेडिकल कलेज र काठमाडौं कलेज तथा अरु कलेजहरुमा समेत विद्यार्थीबाट अवैध रुपमा अतिरिक्त लाखौं रुपैयाँ असुल्ने प्रयास अहिले पनि जारी छ ज्ञापन पत्रमा भनिएको छ । उनले आन्दोलनरत विद्यार्थीहरुको भविष्य अहिले पनि अन्योलमा रहेको उल्लेख गरेका छन् ।

चिकित्सा शिक्षा आयोग र विश्वविद्यालयको निर्देशनका बाबजुद अवैध असुलीको प्रयास र विद्यार्थीमाथिको गुण्डागर्दी अझै जारी भएकाले त्यसलाई तत्काल रोकी दोषी मेडिकल कलेज सञ्चालकहरुमाथि कडा कारवाही गरियोस् ।’ बिज्ञप्तीमा उल्लेख गरेका छन् । देशका सबै तहका स्वास्थ्य संस्थाहरुको चुस्त अनुगमन गरी मापदण्डविपरीतका स्वास्थ्य संस्थाहरुलाई बन्द गराइ दोषीहरुलाई कारवाही गर्न पनि माग गरिएको छ । केसीले माग पूरा नभएमा थप संघर्षको कार्यक्रम तय गर्ने चेतावनी दिएका छन् ।