माओवादी महाधिबेशनमा एमसीसीदेखि नेकपा बिभाजनसम्मका कुरा,आफनै नेताहरुको असन्तुष्टि

काठमाडौं । नेकपा माओवादी केन्द्रको आठौं महाधिबेशनमा नेताहरुले एमसीसीदेखि एमाले माओवादीको पार्टी एकता टिक्न नसकेको सम्म कुरा उठाएका छन् । महाधिबेशनको उद्घाटन समारोहमा पुगेका नेताहरुले महाधिबेशन सफलताको शुभकामना मात्रै दिएनन् सहकार्य र फुटबारे आवाज समेत उठाएका छन् । माओवादी नेताहरुले पार्टीका गतिविधिमा समेत असन्तुष्ट खोलेका छन् । कुन नेताले महाधिबेशनमा के भने त ?
पार्टी एकता गल्ती थिएनः प्रचण्ड
नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एमालेसँग गरेको पार्टी एकता गल्ती नभएको जिकिर गरेका छन् । पार्टीको आठौं महाधिवेशनको उद्घाटनमा प्रचण्डले के कारणले पार्टी एकता भंग भयो त्यसको आत्मसमीक्षा गर्नुपर्ने बताए । महाधिवेशनको उद्घाटनमा नेकपा एमालेका महासचिव शंकर पोखरेलले नेकपाको एकता जोगाउन नसकेकोमा पछुतो भएको बताएका थिए ।

उनको भनाइको प्रशंसा गर्दै प्रचण्डले एकता किन जोगिएन भनेर आत्मसमीक्षा गर्नुपर्ने बताएका हुन् । नेकपा एकीकृत समाजवादीका अध्यक्ष माधवकुमार नेपालसँग पछिल्लो समय धेरै नजिक भएर काम गरेको भन्दै प्रचण्डले गठबन्धन भन्दा अगाडि बढ्न चाहेको प्रस्ताव गरे । आफूले आठौं महाधिवेशनमा पेश गर्ने राजनीतिक दस्तावेजमा सबैभन्दा बढी आफ्नै आत्मसमीक्षा गरेको प्रचण्डको भनाई छ ।
एमसीसी सम्झौता पढ्न प्रधानमन्त्री देउवाको सुझाव,राष्ट्रघात नभएको जिकिर
प्रधानमन्त्री शेरबहादुर देउवाले अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी) नेपालको हितमा रहेको जिकिर गरेका छन् । देउवाले एमसीसी राष्ट्रघाती भन्नेहरुले एमसीसी पढेका छन् भनेर प्रश्न गरेका थिए । ‘राष्ट्रघाती भन्नेले पढ्या छ कि छैन, त्यो पनि थाहा छैन । पहिले पढ्नुपर्यो एमसीसी, कहाँ छ राष्ट्रघात ? मैले त कहीं देखेको छैन’ उनले भने, ‘म पनि नेपालको प्रधानमन्त्री हुँ । म नेपाल राष्ट्रको खिलाफमा जाउँला ? म पनि प्रजातन्त्रका लागि लडेको मान्छे हुँ । म किन राष्ट्रघात गरौंला ।’ प्रधानमन्त्री देउवाको भनाई छ ।

कांग्रेस सभापति समेत रहेका देउवाले एमसीसीबारे सत्तारुढ दलहरुबीच छलफल भइरहेको बताएका थिए । एमसीसी नेपालको हितमा भएको प्रधानमन्त्रीको जिकिर छ । ‘वर्ल्ड बैंक एडीबीबाट हामी ऋण लिन्छौं, त्यसमा अन्तर्राष्ट्रिय कानून लागू हुन्छ । एमसीसी सित्तैं आएको छ, नेपालको कानून मान्छु भन्या छ, तैपनि मान्दैन । राम्रोसँग बुझ्नुपर्‍यो क्या ’ प्रधानमन्त्रीको भनाई थियो । व्यापक छलफल भएर सहमतिका आधारमा एमसीसी पास हुने आफ्नो विश्वास रहेको उनको विश्वास छ ।
एकता जोगाउन नसकिएकोमा पछुतो छः पोखरेल
एमालेका महासचिव शंकर पोखरेलले नेकपाको एकता जोगाउन नसकेकोमा पछुतो रहेको बताएका छन् । महासचिव पोखरेलले कार्यनीति र स्वार्थका प्रश्नमा अल्झिएका कारण पार्टी एकता जोगाउन नसकेको बताएका हुन् । उनले कार्यनीतिमा देखिएको भिन्न मतका कारण वामपन्थी आन्दोलन गलत दिशामा गएको बताए ।

नेताहरुको अन्तरकलहमा आधारित नीति बनाउने र त्यसैमा बहकिने प्रवृत्तिबाट वाम आन्दोलन अगाडि बढ्न नसक्ने पोखरेलको भनाई थियो । उनले अघिल्लो आम निर्वाचनमा एमाले र माओवादी मिलेर जनताको विश्वास जितेपनि एकता जोगाउन नसकिएको बताए ।
अव पछाडि फर्किने अवस्था छैन्ः नेपाल
नेकपा एकीकृत समाजवादी पार्टीका अध्यक्ष माधवकुमार नेपालले इतिहास अघि बढिसकेको भन्दै अब पछाडि फर्कने कुनै सम्भावना नरहेको प्रस्ट पारेका छन् । उनले अब मुलुकमा कुनै व्यक्ति वा वंशको तानाशाही स्वीकार्य हुन नसक्ने बताएका हुन् । नयाँ नेपाल निर्माण गर्ने हाम्रो मान्यता र विचार के हुन् भन्नेबारेमा दलहरुबीच छलफल गर्न जरुरी रहेको नेपालको भनाई छ ।

नेपालको राजनीतिक इतिहासमा दलहरू एकताबद्ध भएर अघि बढ्दा सफलता मिलेको चर्चा गर्दै उनले अहिले पनि एकताबद्ध भएर अघि बढ्न जरुरी रहेको बताए । राजतन्त्र अन्त्य, गणतन्त्र स्थापना, संघीयता, धर्मनिरपेक्षतालाई जोगाउन दलहरू एकै ठाउँमा उभिनुपर्नेमा उनले जोड दिएका थिए । प्रधानमन्त्री शेरबहादुर देउवालाई यस्तो छलफल र बहस आयोजना गर्न सुझाव समेत दिए ।

कार्यक्रममा जनता समाजवादी पार्टी जसपाका अध्यक्ष उपेन्द्र यादवले संसद अवरुद्ध गरेर केही प्राप्त नहुने बताएका छन् । अब संसदको अवरोध हटाएर सहमतिका आधारमा संविधान संशोधन गर्नुपर्नेमा उनले जोड दिएका थिए । अध्यक्ष यादवले दिपावली गर्नेहरुको मात्र होइन, ब्ल्याक आउट गर्नेहरुको पनि अपनत्व दिलाउन संविधान संशोधन गर्नुपर्ने बताए । अध्यक्ष यादवले संघीय गणतन्त्रको विकल्प अरु कुनै तन्त्र हुन नसक्ने बताए ।

थप समाचार

अमेरिकी राष्ट्रपतिका उमेद्वार ट्रम्प–ह्यारिस पहिलो पटक आमनेसामने

प्रधानमन्त्री ओलीलाई बालेनले भने–उहिल्यै मरिन् सासू, अहिले आए आँसु

रवि लामिछानेले भेटे प्रधानमन्त्री ओली,पोखरामा कालोझण्डा देखाएकोमा असन्तुष्टि

उपसभामुख रानालाई किन हटाउन खोज्दैछन् सत्तारुढ दल, यस्तो छ लागेको…

प्रतिनिधिसभा बैठक बस्दै, यस्तो छ कार्यसूची

५ जिल्लाका सीडीओ फेरिए, काठमाडौँमा जयनारायण आचार्य