सदस्य हुन्छु भन्दापनि सदस्यता नदिने कांग्रेस, क्रियाशील सदस्यतामा जुँगाको लडाई

काठमाडौं । महाधिवेशन हुन दुई महिना पनि बाँकी छैन । तर, नेपाली काँग्रेस क्रियाशील सदस्यता विवाद मै अल्झिरहेको छ । अचम्मको कुरो, पार्टीमा आबद्धता जनाउन चाहने कार्यकर्ताको चाहना गुटगत स्वार्थका कारण छानबिन प्रक्रियासम्म पुगेको छ । कति नेताले त क्रियाशील सदस्यको कोटा समेत पाएका छन् । संसारमा कुनै दलभित्र नहुने सदस्यता विवाद नेपालमा मात्र हुने गर्छ । नेपाली कांग्रेसको आसन्न १४ औं महाधिवेशनका प्रारम्भिक मतदाता हुन्, क्रियाशील सदस्य । तर, भागवण्डाको राजनितिले कहिल्यै मुक्त बन्न नसकेको कांग्रेसको महाधिबेसन यही झगडाले प्रभावित हुने अवस्थामा पुगेको छ । जसरी भएपनि दलमा पडक जमाउने स्वार्थका कारणमा गुटमा बाँडिएका नेताहरु पार्टीमा विरोधि पक्षधरका क्रियाशील सदस्यको संख्या कम गराउन चाहन्छन् ।

कांग्रेसको महाधिवेशन प्रतिनिधि चुन्ने क्रियाशील सदस्यले हुन् । तल्लो तहमा नै विपक्षीलाई रोक्न सकेको खण्डमा पार्टीमा कब्जा जमाउन सक्ने स्वार्थ कै कारण यो विवादलाई नेताहरुले मलजल गरि रहेका छन् । महाधिवेशन आयोजनाको कार्यतालिका अनुसार असार २० गते अर्थात आइतबार क्रियाशील सदस्यता छानबिन समितिले विवाद टुंग्याएर सूची केन्द्रीय समितिलाई बुझाइ सक्नु पर्ने थियो । तर, छानबिन समितिले अहिलेसम्म ३० जिल्लाको मात्र विवाद समाधान गर्न सकेको छ । बाँकी ४७ जिल्लाको बिवादका कारण महाधिवेशन नै प्रभावित बन्न सक्ने सम्भावना पनि छ । कांग्रेस केन्द्रीय कार्यसमितिका पदाधिकारी र पूर्व पदाधिकारीहरुले यो बिवादलाई किनारा लगाउन नसकेपछि २०७७ फागुन ६ गतेको केन्द्रिय समितिको बैठकले रमेश लेखकको संयोजकत्वमा क्रियाशील सदस्यता छानबिन समिति नै बनायो । समितिमा केन्द्रीय सदस्यहरु आनन्द ढुंगाना, प्रदीप पौडेल, श्याम घिमिरे, जीवन परियार, कल्याण गुरुङ र योगेन्द्र चौधरी सदस्य छन् । लेखक सभापति शेरबहादुर देउवा निकट हुन् । छानबिन समितिले गौशालास्थित सुविधा सम्पन्न आलिशान बंगलामा बसेर देशभरको विवाद टुंग्याउन खोज्दै छ ।

१० लाख सक्रिय सदस्य बनाउने लक्ष्य लिएको कांग्रेसको यो विवाद सुल्झाउन समितिले झन्डै आधा करोड खर्च पनि गरी सकेको छ । तर, नतिजा अहिले पनि शुन्य नै छ । कांग्रेसमा आबद्ध हुन चाहने कार्यकर्तालाई किन रोकिँदै छ ? दलका टाउकेहरुको लडाइँमा कार्यकर्ता नै किन बलिका बोका बनाइन्छन् ? भन्ने प्रश्न कार्यकर्ताले गरिरहेका छन् । क्रियाशील सदस्यको मनोनयनमा नेता अनुकुलको छनोट भएको आरोप बरिष्ठ नेता रामचन्द्र पौडेल पक्षको छ । त्यो पक्षले सभापति शेरबहादुर देउवाको एकलौटी सिफारिसमा सदस्यता बाँडिएको हुँदा निष्पक्ष छानविनका लागि दबाब दिँदै आएको छ । नेता अनुकलको कार्यकर्ता बन्न नसक्ने कांग्रेसमा सधैँ बिभाजनको शिकार बन्दै आउनु परेको छ । यस्ता उदाहरण कांग्रेसमा निकै छन् ।

क्रियाशील सदस्यले नेता निर्वाचित गर्ने हुँदा आफ्नो पक्षलाई बलियो बनाउन क्रियाशील सदस्यता वितरणलाई हतियार बनाउने गरिन्छ । अनि त्यही हतियारले हजारौँ कार्यकर्ताको मनोबल रेटिन्छ । किन सधै देखिन्छ कांग्रेसमा यस्ता कचिंगल ? संवैधानिक बाध्यताकाकारण भदौ भित्रै जसरी भए पनि १४ औं महाधिवेशन गर्नुपर्ने कांग्रेसको आन्तरिक राजनीतिलाई सदस्यता जस्तो सामान्य विवादले तताई रहेको छ । यसले कांग्रेसमा गुटगत स्वार्थ कतिसम्म मौल्याएको छ भन्ने पनि प्रष्ट पार्छ । यो विवाद अझै तन्किने हो भने नेपाली कांग्रेसको वैधानिकता माथि नै प्रश्न उठ्न सक्छ । उता मुलुक संघीयतामा गइसकेपनि अहिलेसम्म कांग्रेस संघीय संरचनामा जान सकेको छैन । यसले कांग्रेसका नेताहरु संगठन प्रति कति अनुत्तरदायि छन् भन्ने पनि प्रष्ट हुन्छ । कांग्रेसमा सधैँ देखिने साना मसिना विवादलाई हेर्दा भन्न सकिन्छ, कहिँ नभएको जात्रा हाडीँ गाउँमा भनेजस्तै भएको छ ।

थप समाचार

अमेरिकी राष्ट्रपतिका उमेद्वार ट्रम्प–ह्यारिस पहिलो पटक आमनेसामने

प्रधानमन्त्री ओलीलाई बालेनले भने–उहिल्यै मरिन् सासू, अहिले आए आँसु

रवि लामिछानेले भेटे प्रधानमन्त्री ओली,पोखरामा कालोझण्डा देखाएकोमा असन्तुष्टि

उपसभामुख रानालाई किन हटाउन खोज्दैछन् सत्तारुढ दल, यस्तो छ लागेको…

प्रतिनिधिसभा बैठक बस्दै, यस्तो छ कार्यसूची

५ जिल्लाका सीडीओ फेरिए, काठमाडौँमा जयनारायण आचार्य