बलात्कार र यौन हिंसा बिरुद्ध गुल्मीमा युवतीहरुले गरे कालो लुगामा आन्दोलन

काठमाडौं । केही समययता देशका विभिन्न ठाउँमा बलात्कार तथा यौन हिंसाका घटनाहरु बढेसँगै पीडित महिलाहरुको न्यायका लागि भन्दै युवायुवती, महिला अधिकारकर्मी लगायतले प्रदर्शन गर्दै आएका छन् । अझ, पछिल्लो समय नाबालिकाहरुलाई बलात्कार गरेका घटनाहरु बहिर आएसँगै आक्रोश र बिरोध बढेको छ । गुल्मी सदरमुकाम तम्घासको  सडकमा कालो पोशाक लगाएर किशोरीले बलात्कार बिरुद्धको अभियान शुरु गरेका छन् ।

देशभर बालिका तथा किशोरी बलात्कारका घटनाहरु बढेपछि  सामाजिक सञ्जालमा पनि कालो रङ्गको प्रोफाइल राखेर विरोध चलिरहेको बेला तम्घासको  सडकमा प्लेकार्ड सहित युवतीहरु बिरोधमा उत्रिएका हुन् । ‘जो बोल्दैन उ बलात्कारी,जो सुन्दैन उ बलात्कारी , तिमी बलात्कारी’ अर्थात् बलात्कार विरुद्ध नबोल्ने ,नसुन्ने र आवाज नउठाउने पनि बलात्कारी हो भन्दै उनीहरुले बलात्कार विरुद्ध आवाज उठाउन विरोध प्रदर्शन गरिएको रचना पाण्डेले बताइन् ।

बिहिबार समग्र देशमा नै अत्यन्तै जल्दो बल्दो तड्कारो समस्याको रूपमा  देखिएको तर न्याय नपाएको यौनजन्य हिंसा र बालिका बलात्कार पछि हत्या गर्ने अपराधी लाई सरकारले संरक्षण गरेको महसुस गर्दै गुल्मीका किशोर किशोरीहरु न्यायका लागि  सडकमा उत्रिएका हुन । सरकार बलात्कार जन्य अपराध रोक , र अपराधी लाई कार्बाही गर , भन्दै तम्घास को बजार परिक्रमा पछि सिडियो गेट अगाडि बसेर मन्तव्य सहित प्रमुख जिल्ला अधिकारी मार्फत नेपाल सरकारका गृहमन्त्री रामबहादुर थापालाई ज्ञापन पत्र बुझाएका छन । यसको सुनुवाइ नभएमा सिहदरबार घेर्न बाध्य हुने उनीहरुले चेतावनी समेत दिएका छन ।