वामदेव गौतमविरुद्ध परेको रिटमाथि बुधबार सर्वोच्चमा सुनुवाई

खोज पत्रिका बुधबार, २०७७ अशोज ७, ११ :२४ बजे

काठमाडौं । सर्वोच्च अदालतले नेकपा उपाध्यक्ष वामदेव गौतमविरुद्ध परेको रिटमाथि आज सुनुवाई गर्ने भएको छ । प्रतिनिधिसभाको निर्वाचनमा पराजित भएका गौतमलाई राष्ट्रिय सभा सदस्य बनाइनु संविधान विपरित भएको भन्दै सर्वोच्च अदालतमा परेको रिटमा सुनुवाई हुन लागेको हो ।

वरिष्ठ अधिवक्ता दिनेश त्रिपाठीले गौतमविरुद्ध रिट दायर गर्नुभएको थियो । गौतमलाई राष्ट्रिय सभामा लगेर जनताको अभिमतको अपमान गरिएको त्रिपाठीको जिकीर छ । नेकपाले संविधानको जालसाजी एवं कपटपूर्ण प्रयोग गरेर गौतमलाई राष्ट्रियसभामा लगेको उनको आरोप छ । गत भदौ २९ गतेको मन्त्रिपरिषद्को निर्णयबमोजिम राष्ट्रपतिले गौतमलाई राष्ट्रियसभाको सदस्यमा मनोनित गरेकी थिइन ।

गौतमलाई राष्ट्रिय सभामा ल्याइनु जनअभिमतको गम्भीर अपमान हुनुका साथै संविधानको धारा २ को स्पष्ट उल्लंघन भएको रिट निवेदनमा जनाइएको छ । धारा २ मा नेपालको सार्वभौमसत्ता र राजकीयसत्ता नेपाली जनतामा निहित रहेको कुरा उल्लेख छ । संविधानको धारा ७५ ले कार्यकारिणी अधिकार मन्त्रिपरिषद्लाई प्रदान गरेको भए पनि त्यसको प्रयोग विवेकहीन तथा स्वेच्छाचारी ढंगले हुन नसक्ने रिट निवेदनमा दाबी गरिएको छ ।