विदेशी बुहारीले अंगीकृत नागरिकता पाउन ७ बर्ष कुर्नुपर्नेः नेकपा

खोज पत्रिका शनिबार, २०७७ असार ६, १२ :४३ बजे

काठमाडौं । सत्तारुढ नेकपाले विदेशी बुहारीले नेपालमा अंगीकृत नागरिकता पाउन ७ बर्ष कुर्नुपर्ने निर्णय गरेको छ । विदेशी महिलाले नेपाली पुरुषसँग बिहे गरेको ७ वर्षपछि मात्रै अंगीकृत नागरितकता दिनुपर्ने नेकपाले शनिबार बसेको सचिवालय बैठकले निष्कर्ष निकालेको छ ।

कुनैपनि विदेशी महिलाले स्वदेशी पुरुषसँग विवाह गरेर सात बर्ष यहाँ बसेको हुनुपर्ने र त्यसबीचमा विदेशको नागरिकता त्यागेको प्रमाण पेस गरेपछि मात्रै नेपाली अंगीकृत नागरिकता दिन सकिने निष्कर्ष निकालेको प्रवक्ता नारायणकाजी श्रेष्ठले जानकारी दिए । नेपाली पुरुष नागरिकसँग विवाह गरेपछि प्राप्त गर्नसक्ने अंगीकृत नागारिकताको प्रावधानवारे यतिबेला संसदीय समितिमा छलफल भइरहेको छ ।

नेकपाले शुक्रबार पार्टीका केही नेता तथा प्रतिनिधिसभाको राज्य व्यवस्था समितिमा रहेका सांसदहरुसँग परामर्श गरेको थियो भने बिहीबार नेपाली काँग्रेससँग छलफल गरेको थियो । तर, कांग्रेस र नेकपाबीच सहमति जुटेको छैन् । प्रतिनिधिसभाको राज्य व्यवस्था तथा सुशासन समितिले बुधबार सहमति जुटाउन ५ दिनको समय दिएको थियो ।