संसदमा संविधान संशोधन प्रस्ताव पेश

खोज पत्रिका आइतवार, २०७७ जेष्ठ १८, १२ :४६ बजे

काठमाडौं । नेपालको संविधान दोस्रो संशोधन विधेयक प्रतिनिधिसभामा पेश भएको छ । कानुन न्याय तथा संसदीय मामिला मन्त्री शिवमाया तुम्बाहाम्फेले संसदमा विधेयक पेश गरेकी हुन् । गत बुधबार सो प्रस्ताव प्रस्तुत हुने भनिएपनि अन्तिम समयमा आएर रोकिएको थियो ।
प्रमुख प्रतिपक्षी दल नेपाली कांग्रेसले केन्द्रीय कार्यसमिति बैठकबाट निर्णय गर्न थप समय मागेपछि रोकिएको थियो । कांग्रेसको केन्द्रीय कार्यसमितिले शनिबार संविधान संशोधनको पक्षमा मतदान गर्ने निर्णय गरेपछि संसदमा पेश गरिएको हो । सरकारले यही जेठ ९ गते संविधानको अनुसूची ३ मा रहेको नेपालको नक्सामा लिम्पियाधुरासहित समेटिने गरी संशोधन प्रस्ताव दर्ता गरेको थियो ।
भारतले अतिक्रमण गरेको लिम्पिायधुरा, कुटी, गुञ्जी, नावी, कालापानीसहितको भूभाग समेटेर राजनीतिक र प्रशासनिक नक्सा सार्वजनिक गरेपछि सरकारले संविधानको अनुसूची पनि संशोधन गर्ने प्रक्रिया अघि बढाउन लागिएको हो ।