हुलाकी राजमार्गमा ठेकेदारको लापरवाही, कालोपत्रे गरेको सडकको यो हालत

बारा ७ साउन । हुलाकी सडक आयोजना अन्तर्गत बाराको महागढीमाई नगरपालिकाको थलही पुल क्षेत्रमा निर्माण गरिएको सडक एक महिना नपुग्दै भत्किएपछि समग्र आयोजनाको सडकको गुणस्तरमै प्रश्न उठ्न थालेको छ । रामन लोकबिर कन्ट्रक्सनले निर्माण गरिरहेको यो सडक भासिएको मात्रै छैन कालोपत्रे समेत उक्किएर खण्डहर बन्न थालेको छ । बाराको बरियारपुर देखि पर्साको अरुवा रोड सम्म १८ करोड ९५ लाख ८० हजार रुपैयाको ठेक्का २०७२ माघ १७ गते सम्झौता गरिएको थियो । सम्झौताको समयसिमा गत जेठ २७ गते नै सकिएपनि समयमै आफ्नो जिम्मेवारी पुरा गर्न नसकेको निर्माण पक्षले म्याद थपको प्रक्रिया अघि बढाएको छ । हुलाकी राजमार्ग अन्तर्गको यो खण्डको सडक निर्माणले स्थानीय जनप्रतिनिधिलाई समेत सन्तुष्ट बनाउन सकेको छैन । ठेकेदार पक्षले गुणस्तरहिन काम गर्दा समेत आयोजनाले नदेखेजस्तो गरेर राष्ट्रिय गौरभको आयोजनामाथी खेलबाड गरिरहेको स्थानीय जाहीर अंसारीले बताए । हुन त, ठेकेदार पक्षसँगै आयोजना समेतले सडक भासिनु र कालो पत्रै उक्किनुको दोस थलही पुल निर्माण गर्ने कम्पनीमाथी लगाइरहेका छन् । गुणस्तरहिन काम गर्ने निर्माण कम्पनीमाथी कारबाही गर्ने अधिकार पाएको योजना कार्यालय बीरगञ्ज मापदण्ड र गुणस्तर लत्याएर काम गर्ने निर्माण पक्षलाई आखिर किन कारबाही गर्न चाहिरहेको छैन ? यसले पनि सडक र पुलमा गुणस्तर हिन काम गराउन आयोजना आफैले सघाइरहेको प्रष्ट हुन्छ । पुल बनाउने ठेकेदारको कमजोरीले होस वा सडक निर्माणमा भएको बद्मासीले निर्माणको एक महिनामै सडक भासिनु र कालोपत्रे समेत उक्किनु गम्भिर लापरबाही हो । मापदण्ड र गुणस्तरमा बेवास्ता गरेर राष्ट्रिय गौरभको आयोजना प्रभावित बनाउने जो कोही भएपनि कारबाही गरिनुपर्ने माग स्थानीले राख्दै आएका छन् । झापाको मेची पुलबाट महेन्द्रनगरको चाँदनी दोधारासम्म महेन्द्र राजमार्गको २० देखि ३० किलोमिटर भित्र मधेशका बस्तीबाट जाने ९ सय ७५ किलोमिटर लामो हुलाकी सडकमा नेपाल–भारत सरकारको संयुक्त लगानी फसेको छ । राणा प्रधानमन्त्री पद्यमशमशेरले राजमार्गका रुपमा अघि सारेको आयोजनाको निर्माण २०६५ सालबाट सुरु भएपनि सडक निर्माणको गति निक्कै सुस्त छ । सरकारले हुलाकी सडकको पूर्वाधारमा मात्रै ५५ अर्ब रुपैयाँ र त्यसमा निर्माण हुने एक सय ५० वटा पुलका लागि १० अर्ब रुपैयाँ गरी कुल ६५ अर्ब रुपैयाँको लागत अनुमान गरेको छ । ३२ वटा सडक सञ्जाल खोल्नुपर्ने भएपनि पहिलो चरणमा १६ वटाको प्रक्रिया अगाडि बढेको छ । पूर्वपश्चिम नौ सय ७५ किमि र सम्बन्धित जिल्लालाई महेन्द्र राजमार्ग तथा भारतीय सीमासम्म जोड्ने थप आठ सय १७ किमिको उत्तर–दक्षिण जोड्ने यो राजमार्गलाई २०६९ जेठमा राष्ट्रिय गौरवको आयोजना घोषणा गरिएपनि निर्माण पक्ष र स्वयम आयोजनाबाटै हुँदै आएको बद्मासीमाथी सरकारले नियमन गर्न सकिरहेको छैन । जसका कारण सडक र पुल निर्माण सुस्त भैरहेको छ भने बनाइएको संरचना पनि गुणस्तरहिन पाइएको छ । चिराचिरा बनेको र कालोपत्रे समेत उक्किएको यो सडक खण्ड  देशको आधा जनसंख्यालाई सडकको सहज पँहुच दिलाउने राष्ट्रिय गौरभको आयोजना हो । निर्माणको गती निक्कै सुस्त देखिएको यो आयोजना अन्तर्गतका विभिन्न सडक खण्डहरु यसरी फुट्न र छोटो समयमै कालोपत्रे उक्किन थालेका छन् । मधेशको आर्थिक र सामाजिक अवस्था परिवर्तन गराउने आयोजनाका रुपमा प्रचार गरिएको हुलाकी राजमार्गमा भैरहेको बजेटमाथीको दुरुपयोग रोक्न सरकार गम्भिर बन्नैपर्छ ।

थप समाचार

विस्तृत शान्ति सम्झौताको १८ वर्षः युद्ध गर्ने नेताको जीवनशैली फेरियो,…

बालुवाटारमा ओली-देउवासहित कांग्रेस र एमालेका शीर्ष नेताहरू छलफलमा

प्रधानमन्त्री, मन्त्री र जनप्रतिनिधिले अनुमति नलिइ उपनिर्वाचनको प्रचारमा हिँड्न नपाउने

मेडिकल व्यवसायी दुर्गा प्रसाईं दोस्रो पटक पक्राउ, प्रधानमन्त्री ओलीविरुद्ध भ्रामक…

हिरासतमा रहेका रवि लामिछानेको बोलीले प्रहरी तनावमा,मौका पाउने बित्तिकै सरकारलाई…

नारायणगढ–बुटवल सडकको ठेक्का सम्झौता रद्ध गर्ने प्रधानमन्त्रीको चेतावनी