खुल्ला मञ्चका ५२ सटर महानगरले भत्कायो

काठमाडौं १४ बैशाख । चौतर्फी बिरोध भएपछि काठमाडौंको खुल्ला मञ्चमा बनाइएका ५२ सटर काठमाडौ महानगरपालिकाले डोजर लगाएर भत्काएको छ । सार्वजनिक जग्गा हडपी रहेका तथ्यहरु बाहिर आएपछि खुल्ला मञ्च समेतमा सटर बनाउन लागेको कुरा बाहिरिएको थियो । महानगरका प्रमुख बिद्यासुन्दर शाक्य र उपप्रमुख हरिप्रभा खड्काबीच आरोप प्रत्यारोप चलेको थियो । डोजर लगाएर भत्काउने खुल्ला मञ्चमा उपप्रमुख खड्का पनि उपस्थित थिइन । तर, सटरवालाले बिरोध जनाउन थालेपछि उनी बाहिरिएकी थिइन । महानगरपालिकाले शनिवार दिउसोदेखि खुलामञ्चमा डोजर लगाएर अवैध रुपमा बनाएइका सटर भत्काइदिएको हो ।

डोजर चलाइएपछि त्यहाँ स्थित पसलेहरुको भागाभाग र रुवावासी समेत मच्चिएको थियो । महानगर प्रहरीका प्रमुख धनपति सापकोटाले महानगरपालिकाको निर्देशन लगत्तै डोजर लिएर आफूहरु खुलामञ्चका सटर भत्काउन गएको जानकारी दिए । महानगरपालिका र ठेकेदार मनोजकुमार भेटवालको स्वच्छन्द विल्डर्सको मिलेमतोमा खुल्लामञ्च ठेक्का दिएको खुलासा भएपछि यसको चौतर्फी विरोध भएको थियो ।