पानी परेपछि बारा र पर्साका हावाहुरी प्रभावितहरु थप समस्यामा

वीरगञ्ज २३ चैत । पानी परेपछि हावाहुरी प्रभावित बारा र पर्साका स्थानीयहरु थप समस्यामा परेका छन् । शनिबार बिहान मेघगर्जनसहित पानी परेपछि उनीहरु त्रसित भएका हुन्। हावाहुरीबाट प्रभावित भएकाहरु घर भत्किएपछि अहिले त्रिपालमुनि बस्दै आएपनि पानीका कारण समस्या भएको छ । उनीहरुलाई पानी परेसंगै ओत लाग्न समेत समस्या भएको छ। बारा र पर्सा जिल्लामा गत आईतबार आएको आँधीहुरीबाट करिब २४ सय घरहरुमा क्षति भएकोमा करिब एक हजार घरहरु पुर्णरुपमा क्षतिग्रस्त भएका थिए ।