घट्यो पेट्रोल, डिजेल र मट्टितेलको मूल्य प्रतिलिटरमा ३ रुपैयाँ

खोज पत्रिका आइतवार, २०७९ पुस २४, २१ :४० बजे

काठमाडौं । नेपाल आयल निगमले इन्धनको मूल्य घटाएको छ । आइतबार मध्यरातिदेखि लागू हुने गरी पेट्रोल, डिजेल र मट्टितेलको मूल्य प्रतिलिटरमा ३ रुपैयाँ घटाएको बिज्ञप्ती मार्फत जनाइएको छ ।

अब पेट्रोल लिटरको १ सय ७५ तथा डिजेल र मट्टितेल लिटरको १ सय ७२ रुपैयाँ पर्नेछ । यस्तै हवाई इन्धनको मूल्य पनि घटेको छ ।

आन्तरिक तर्फ प्रतिलिटर २० रुपैयाँ र बाह्यतर्फ प्रतिकिलोलिटर २ सय २५ डलर (करिब प्रतिलिटर ३० रुपैयाँ) घटेको नेपाल आयल निगमले जनाएको छ ।

नयाँ मूल्यअनुसार हवाई इन्धन आन्तरिकतर्फ प्रतिलिटर १ सय ७० र बाह्यतर्फ प्रतिकिलोलिटर १ हजार ४ सय २० डलर पर्नेछ । खाना पकाउने एलपी ग्यासको मुल्य भने हेरफेर भएको छैन ।

भारतबाट मुल्य घट्दै आएपनि सरकारले पेट्रोलियम पदार्थको मूल्य समायोजन गर्न भने आलटाल गर्दै आएको छ ।