जापान पुगेर किन बोले प्रचण्डले झुट, भेटे भनिएका सिन्जो आबे नेपाल आएकै थिएनन्

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्ड ५ दिने जापान भ्रमणका लागि टोकियो पुगेका छन् । नरिता अन्तर्राष्ट्रिय विमानस्थलमा प्रचण्डलाई जापानका लागि नेपाली राजदूत दुर्गाबहादुर सुवेदीलगायतका दूतावासका अधिकारीले स्वागत गरेका छन् ।

त्यस्तै जनप्रगतिशील मञ्च, जापानका पदाधिकारीसहित प्रवासी नेपाली पनि उनको स्वागतमा पुगेका थिए । सञ्चारकर्मीसँग कुरा गर्दै अध्यक्ष प्रचण्डले जापानका पूर्वप्रधानमन्त्री सिन्जो आबेलाई भेट्ने इच्छा पूरा नभएको बताए । गत जुलाई ८ मा चुनावी सभालाई सम्बोधन गरिरहेकै बेला एक बन्दुकधारीले गोली हानेर आबेको हत्या गरेका थिए ।

आबे माग र मूल्य बढाएर घरेलु अर्थतन्त्रलाई प्रबर्द्धन गर्ने अर्थनीतिमा सफल भएका थिए । प्रचण्डले आबेसँग आफ्नो सम्बन्ध राम्रो भएको पनि दाबी गरे । त्यस्तै पूर्वप्रधानमन्त्रीका रूपमा सिन्जो आबे नेपाल भ्रमणमा आउँदा आफूसँग २ ३ पटक कुराकानी भएको प्रचण्डले दाबी गरेका थिए । दाहालले आबेलाई भेट्ने इच्छा पूरा नभएको उल्लेख गर्दै भने, म जापान आउने तय भएसँगै पूर्वप्रधानमन्त्री सिन्जो आबेसँग भेट्नका लागि समय मिलाउन खोजेको थिएँ ।

नेपाल आउदा भेटेको भनिएका आबे दुई पटक जापानका प्रधानमन्त्री भएका बेला नेपाल भ्रमणमा आएको कुनै रेकर्ड छैन । अहिलेसम्म जापानबाट एक पटक बहालवाला प्रधानमन्त्री नेपाल भ्रमणमा आएका छन् । सन् २००० मा जापानका तत्कालीन प्रधानमन्त्री योसिरो मोरी नेपाल भ्रमणमा आएका थिए । आबे प्रधानमन्त्री वा पूर्वप्रधानमन्त्रीका रुपमा नेपाल भ्रमणमा नआएको परराष्ट्रका जानकारहरुले बताएका छन् ।

थप समाचार

डा.बाबुराम भट्टराईको प्रस्ताव प्रत्यक्ष निर्वाचित राष्ट्रपति, सांसद मन्त्री बन्न नपाउने

लुम्बिनी प्रदेशको बजेट आइबार आउँदै, चालू आवभन्दा घटाइँदै

मन्त्री पन्तले भने निजी विद्यालयलाई निषेध गरेर जान सकिँदैन

०८३ को मंसिर अघि नै महाधिवेशन हुन्छः गगन थापा

जनार्दन शर्मालाई पार्टी छोड्न नभनेको प्रचण्डको दाबी

कंगोमा डुङ्गा डुब्दा कम्तीमा ५४ जनाको मृत्यु