श्रीलंकामा राष्ट्रपति निवास प्रदर्शनकारीको कब्जामा, प्रधानमन्त्री सुरक्षित स्थान खोज्दै

खोज पत्रिका शनिबार, २०७९ असार २५, १९ :३७ बजे

काठमाडौं । श्रीलंकामा सरकार विरोधी प्रदर्शन झनै हिंसात्मक बनेको छ । शनिबार प्रदर्शनकारीहरूले राष्ट्रपति निवास घेराउ गर्न थालेपछि राष्ट्रपति गोताबाया राजापाक्षे सरकारी निवास छाडेर भागेका उनलाई अज्ञात र सुरक्षित स्थानमा सारिएको छ । प्रदर्शनकारीहरूको समूहले राजधानी कोलम्बोस्थित उनको निवासलाई कब्जामा लिएका छन् ।

सामाजिक सञ्जालमा सार्वजनिक भएका भिडियोमा भने राष्ट्रपति निवासभित्र प्रवेश गरेका प्रदर्शनकारीहरूले स्वीमिङ खेल्नुका साथै चिया पिइरहेको दृश्य देखिन्छन् । राष्ट्रपतिको राजीनामा माग गर्दै उठेको प्रदर्शन हिंसात्मक बन्दै गएको छ । हजारौंको संख्यामा रहेका प्रदर्शनकारीहरूले पुलिस ब्यारिकेड साथै राष्ट्रपति कार्यालयको गेट तोडफोड गरेको बताइएको छ ।

प्रदर्शनकारीहरूले श्रीलंकाको राष्ट्रिय झण्डा प्रदर्शन गर्नुका साथै राष्ट्रपति सरकार विरोधी ब्यानर देखाएका छन् । प्रदर्शनलाई नियन्त्रणमा लिन ठूलो संख्यामा सुरक्षाकर्मी खटाइए पनि प्रदर्शन झनै चर्किएको छ । सेना र प्रहरीले भीड नियन्त्रणमा लिन संयुक्त रुपमा प्रयास गरेपनि भीड अनियन्त्रित बन्दै गएको छ ।

सुरक्षाकर्मीले थुप्रै अश्रुग्यास प्रहार गर्नुका साथै हवाइ फायर पनि गरेको छ । प्रहरीले कर्फ्यू लगाए पनि प्रदर्शनकारीहरू त्यसको अवज्ञा गर्दै सडकमा उत्रिएका हुन् । प्रदर्शनकारी र सुरक्षाकर्मीबीच झडप हुँदा दर्जनौं प्रहरी अधिकृतसहित ठूलो संख्यामा मानिसहरू घाइते भएका छन् ।