बेलायती प्रधानमन्त्री जोन्सनको पद पर्यो धरापमा

खोज पत्रिका बिहिबार, २०७९ असार २३, ०७ :२८ बजे

काठमाडौं । बेलायतका प्रधानमन्त्री बोरिस जोनसनको सरकार धरापमा परेको छ। थप पाँच जना कनिष्ठ मन्त्रीले बुधबार सामूहिक राजीनामा दिएपछि राजीनामा दिने सांसदको संख्या २७ पुगेको छ। प्रधानमन्त्रीको कार्यशैलीप्रति असन्तुष्ट जनाउँदै एकपछि अर्को मन्त्रीले राजीनामा दिइरहेका छन् ।

मन्त्रीहरुको राजीनामापछि प्रधानमन्त्री जोनसन राजनीतिक संकटमा परेका छन्। प्रधानमन्त्रीले राष्ट्रिय हित विपरित गरेको उनीहरुले आरोप लगाएका छन्। अर्थमन्त्री ऋषि सुनक र स्वास्थ्यमन्त्री साजिद जाविदको राजीनामापछि बुधबार एकपछि अर्को मन्त्रीले राजीनामा दिए ।

राजनीतिक संकट चर्किरहेका बेला प्रधानमन्त्री जोनसनले लेभलिङ अप, हाउजिङ तथा कम्युनिटी मन्त्री माइकल गोभलाई बर्खास्त गरेका छन्। यसअघि गोभले प्रधानमन्त्रीको राजीनामा माग गरेका थिए । ठूलो संख्यामा मन्त्रीहरूको राजीनामा र पार्टीभित्रै भइरहेको विद्रोहबीच प्रधानमन्त्रीले राजीनामा नदिने अडान राखिरहेका छन् ।

क्याटेगोरी : राजनीति, विदेश, समाचार
ट्याग : #बेलायतका प्रधानमन्त्री बोरिस जोनसन