स्थानीय तहको निर्वाचनका दिन मानवीय उद्धार, सहायता र सरकारको निर्देशनमा मात्रै उडान

खोज पत्रिका आइतवार, २०७९ बैशाख २५, १७ :४० बजे

काठमाडौं । वैशाख ३० गते शुक्रवार स्थानीय तह चुनावको मतदानका कारण आन्तरिक उडान बन्द हुने भएका छन् । निर्वाचन आयोगको निर्णयअनुसार ३० गते सबै नियमित उडान बन्द रहने वायु सेवा सञ्चालक सङ्घ नेपालले जानकारी दिएको हो ।

मतदानको दिन भएपनि मानवीय उद्धार, सहायता उडान र सरकारको निर्देशनमा हुने उडान भने सञ्चालन हुने बताइएको छ । निर्वाचन आयोगको सिफारिसमा सरकारले ३० गते देशभर सार्वजनिक गाडी र हवाई यातायात बन्द गर्ने निर्णय गरेको छ ।

निर्वाचनका कारण अन्तर्राष्ट्रिय उडान भने नरोकिने र विमानस्थल आउ जाउका लागि यात्रुलाई प्रमुख जिल्ला अधिकारीले समन्वय गरेर सहजिकरण गर्ने बताइएको छ । मतदानको समयमा हुने यस्ता प्रतिबन्धात्मक व्यवस्थालाई सरकारले चुनावका नियमित प्रक्रियाका रुपमा बुझेर सहयोग गर्न सबैलाई आह्वान गरेको छ ।