लकडाउन आजदेखि झनै कडा, बाहिर निष्किन पालना गर्नुपर्ने नियम यस्ता

खोज पत्रिका बिहिबार, २०७७ जेष्ठ १, ०९ :३१ बजे

काठमाडौं १ जेठ । नेपालमा पछिल्लो समय कोरोना संक्रमितको संख्या ह्वात्तै बढेपछि लकडाउनमा अझै कडाई गरिएको छ । सोमबारदेखि अस्वाभाविक रुपमा संक्रमित संख्या बढेपछि सरकारले एक जिल्लादेखि अर्को जिल्लामा आवात जावत गर्नेहरुको पास समेत गृहमन्त्रालयले आजदेखि रद्ध गरेको छ । प्रधानमन्त्री केपी शर्मा ओलीले मन्त्रिपरिषद बैठकमा कोरोना रोकथामसम्बन्धी संयन्त्रमा रहेका मन्त्रीहरुसँग लकडाउन अझ कडाई गर्न निर्देशन दिएका थिए ।

बिहिबारदेखि एउटा जिल्लाबाट अर्कौ जिल्लामा जान रोक लगाइएको छ । अत्यावश्यक सेवाका लागि प्रस्थान र पुग्ने दुवै जिल्लाका सिडिओको अनुमति लिनुपर्नेछ । सञ्चालन हुन पाउने सवारी साधनको आवश्यकता र अनिवार्यतालाई हेरेर छुट दिइनेछ ।काठमाडौं उपत्यकाभित्र छिर्न कडाई गरिएको छ । उपत्यकाको हकमा भने तीनवटै जिल्लालाई एउटै जिल्ला सरहको व्यवहार गरेर कडाई गरिने छ ।

घरबाट बाहिर निष्किदा पालना गर्नुपर्ने नियम
१ एक जिल्लाबाट अर्को जिल्लामा जाने गरी जारी भएका ईपाससहित सबै सवारी पास रद्द
२ अत्यावश्यक अवस्थामा एक जिल्लाबाट अर्को जिल्लामा जाने पास जारी गर्नुपरेमा जारी गर्ने जिल्लाले पुग्ने जिल्लाको प्रमुख जिल्ला अधिकारीको अनिवार्य स्वीकृतिमा मात्रै जारी गर्नुपर्ने ।
३ अत्यावश्यक अवस्थामा काठमाडौं उपत्यका बाहिरका जिल्लाबाट काठमाडौं उपत्यकाभित्र प्रवेशका लागि सवारी पास जारी गर्नुपरेमा गृहमन्त्रालयको स्वीकृति लिनुपर्ने।
४ त्यसरी पास जारी गर्दा पासमा गृहमन्त्रालयको स्वीकृति नम्बर समेत समावेश गर्नुपर्ने।
५ पास स्वीकृतिका लागि अनुरोध गर्दा पास जारी गर्नुपर्ने प्रयोजन र पुस्ट्याइँ समेत खुलाउनुपर्ने।